A presenza de persoas de orixe estranxeira e de emigrantes retornados na nosa cidade pon de manifesto que o fenómeno da inmigración é unha realidade próxima, crecente e complexa, convertendo esa diversidade e multiculturalidade nun reto e nunha oportunidade.

En concreto, en Vigo, nos últimos anos fóronse producindo paulatinos cambios na composición sociodemográfica da poboación inmigrante, tanto nos aspectos cuantitativos, derivados do incremento de novos/as veciños/as na cidade, como en aspectos cualitativos, debido á variedade de países de orixe dos/as inmigrantes, a súa distribución na contorna urbana, ou das súas necesidades en materia de emprego ou de vivenda, por citar só algunhas das características máis importantes.

A oficina de información a persoas migrantes configúrase como o servizo comunitario específico que da resposta a eses retos, a través de dous programas:

• O programa de información e asesoramento, que ofrece información e a xestión dos informes necesarios nos procedementos de regularización e reagrupación familiar así como todo tipo de orientacións sobre recursos sociais, educativos, sanitarios, prestacións e para a procura de emprego para inmigrantes e emigrantes retornados/as.
• O programa de mediación intercultural, que pretende propiciar o encontro intercultural co obxectivo de previr situacións de conflito e proporcionar apoio e orientación ás persoas, traballando tanto coa sociedade de acollida como coas persoas de orixe estranxeira que proxecten a súa vida na cidade, axudándolles a adecuar o seu proxecto migratorio á realidade local.

Todo elo sen que, dende a área de Servizos Sociais, e dende a perspectiva da atención normalizada, se deixe de prestar especial atención ás necesidades específicas do colectivo inmigrante, na medida en que se trata dun colectivo cun nivel de vulnerabilidade social e dificultades que requiren de intervencións puntuais e específicas.

Persoas destinatarias

Poboación estranxeira, comunitaria e extracomunitaria, empadroada na cidade de Vigo e persoas emigrantes retornadas.

Acceso ao servizo

Mediante a cita previa, agás situacións consideradas de urxencia. As citas poden ser solicitadas polas persoas interesadas directamente ou ben por derivación dos servizos sociais municipais.

Folletos informativos

• Guía de información e acollida para persoas de procedencia estranxeira
• Arraigamento social (inglés / galego)
• Arraigamento social (francés / galego)
• Reagrupación familiar (inglés / galego)
• Reagrupación familiar (francés / galego)
• Reagrupación familiar (chino / galego)
• Regularización de menores ou incapacitados (inglés / galego)
• Regularización de menores ou incapacitados (francés / galego)
• Regularización de menores ou incapacitados (chino / galego)
• 1º Plan das migracións e convivencia intercultural de Vigo (2009-2013)

Regulamento do Consello Municipal das Migracións

O día 4 de setembro de 2008 o Pleno do Concello aprobou:

1. Crear o Consello Municipal das Migracións do Concello de Vigo (CSM) como órgano colexiado permanente de participación social nesta materia, que terá carácter consultivo e asesor e funcións de informe e, no seu caso, proposta, en todas as cuestións referentes ás súas competencias.
2. Aprobar inicialmente o seu Regulamento de Organización e Funcionamento, abrindo un período de información pública polo prazo de 30 días para a presentación de reclamacións e suxestións.
3. Declarar que, consonte co establecido -por analoxía- no artigo 49.c da LRBRL (L.7/1985), de non se presentar ningunha reclamación ou suxestión, entenderase definitivamente adoptado o acordo ata entón provisional, debendo publicarse o texto íntegro do Regulamento no BOP; entrando en vigor ós quince (15) días da súa publicación completa».