A Valedora da cidadanía é o comisionado do Pleno do Concello de Vigo para a defensa dos dereitos e intereses da veciñanza de Vigo, que poderá supervisar a actuación da Administración municipal e o resto dos organismos e entidades dependentes dela, no ámbito das competencias que se lle atribúen no regulamento.

Toda persoa natural ou xurídica, sen distinción de clase que teña interese lexítimo poderá dirixirse a Valedora da cidadanía. Os concelleiros e concelleiras de Vigo e mailos grupos municipais constituídos poderán pedir mediante escrito motivado, a intervención da Valedora da cidadanía para a investigación ou esclarecemento de actos, resolucións e condutas concretas efectuadas na Administración municipal de Vigo, que lle afecten a un cidadán ou grupo de cidadáns

Competencias

As competencias da Valedora da cidadanía esténdense á Administración municipal, aos seus organismos autónomos, empresas e demais entes públicos que dela dependan ou que nela participen, aínda que esta sexa minoritaria; aos servizos xestionados mediante concesión administrativa e, en xeral, calquera organismo ou entidade pública ou privada, que realice funcións de servizo público e se atope suxeita a calquera tipo de tutela naquilo no que afecte ás materias integradas na competencia da Administración municipal de Vigo.

Das queixas ou denuncias que reciba con referencia ás administracións públicas alleas á Administración municipal, a Valedora da cidadanía informará, orientará e tramitará a petición da persoa interesada a correspondente queixa diante da "Defensora del Pueblo" ou da "Valedora do Pobo" no seu caso.

Quedan excluídos da competencia da Valedora da cidadanía a Administración periférica do Estado e da Xunta de Galicia no municipio de Vigo e os organismos autónomos, empresas públicas ou que participen ou concesionarias de servizos públicos da Administración do Estado e da Xunta de Galicia; a Administración de Xustiza; todas as cuestións de persoal ou que estean sometidas a procedementos xurisdicionais e as funcións de control político da actividade municipal.

Tramitación de queixas

As queixas ou denuncias que se dirixan a Valedora da cidadanía formularanse pola propia persoa interesada, nun escrito e no prazo máximo dun ano, que contará a partir do momento no que se coñezan os feitos que a motivan. As actuacións que acheguen queixas perante a Valedora da cidadanía serán gratuítas para a persoa interesada sen que sexa necesaria a asistencia do letrado ou procurador.

Admitida a queixa, a Valedora da cidadanía promoverá a oportuna investigación sumaria e informal, para o esclarecemento dos seus presupostos e informará a persoa interesada dos seus resultados.

A Valedora da cidadanía dará conta anualmente ao Pleno do Concello de Vigo da xestión realizada e os informes estarán a disposición da veciñanza.