B A N D O INFORMATIVO CELEBRACIÓN DE CACHARELAS DE SAN XOÁN ANO 2024

B A N D O INFORMATIVO

CELEBRACIÓN DE CACHARELAS DE SAN XOÁN ANO 2024

O artigo 9 da Lei 3/2007, do 9 de abril, de prevención e defensa contra os incendios forestais de Galicia, modificada pola Lei 7/2012, do 28 de xuño, de montes de Galicia, establece que, en consideración aos antecedentes e datos históricos sobre o risco de aparición de incendios forestais en Galicia e sobre a incidencia das variables meteorolóxicas no comportamento do lume, a consellería con competencias en materia forestal definirá a época de perigo alto, que condicionará a intensidade das medidas que se vaian adoptar para a defensa do territorio de Galicia.

A data da sinatura do presente Bando, aínda non se aprobou a correspondente Orde da Consellería do Medio Rural.

Consonte ao disposto no artigo 36.1 da devandita Lei, en concordancia co artigo 15.8 do Decreto 105/2006, de 22 de xuño, polo que se regulan as medidas relativas á prevención de incendios forestais, nas zoas agrícolas, forestais e nas zoas de influencia forestal, queda prohibido, con carácter xeral, realizar, durante a época de perigo alto de incendios (1) fogueiras para recreo ou ocio e para a preparación de alimentos, así como utilizar equipamentos de queima e combustión destinados á iluminación ou elaboración de alimentos e (2) a queima de matogueiras e calquera tipo de sobrantes de explotación, limpeza de restos ou calquera outro obxecto combustible. Porén, de conformidade co disposto no artigo 36.5 da devandita Lei, o Concello poderá autorizar, excepcionalmente, o uso do fogo con motivo da celebración de festas locais ou de arraigada tradición popular, como é a Festividade de San Xoán, coas medidas de seguridade e de prevención de incendios forestais que a tal efecto se determinen.

A autorización municipal para este tipo de eventos populares resulta obrigatoria tanto se comporta unha ocupación especial e temporal das vías ou espazos públicos como se realiza e desenvolve en terreos de titularidade privada, consonte ao disposto nos artigos 41 letra c) da Lei 9/2013, de 19 de decembro, do Emprendemento e da competitividade económica de Galicia), e 36.5 da Lei 3/2007 de 9 Abril, da Comunidade Autónoma de Galicia, de prevención e defensa contra os incendios forestais, art. 4 c) da Lei 10/2017 de Espectáculos públicos e actividades recreativas, art. 3 e) e apartado II.5 do Anexo do Decreto 124/2019 de Galicia polo que se aproba o Catálogo de espectáculos públicos e actividades recreativas de Galicia.

Por todo o exposto e de conformidade co disposto no artigo 84.1 a) da Lei 7/1985 de 2 Abril, Reguladora das bases do Réxime Local, en concordancia co artigo 7.3 do Decreto de 17 de xuño de 1955, polo que se aproba o Regulamento de servizos das corporacións locais, emítese o presente Bando, no que se informa, para coñecemento público, do réxime legal ao que quedan sometidas as autorizacións de queimas e uso do lume durante a época de perigo alto de incendios forestais no termo municipal de Vigo, para este ano:

1.- Desde o 01 de xullo de 2024 ata o 30 de setembro de 2024 (art. 9 da Lei 3/2007; Orde de 22/05/2023 da Consellería do Medio Rural e do mar publicada no DOG de 01 de xuño de 2023), o Concello de Vigo unicamente poderá autorizar o uso do lume nas zoas agrícolas, forestais e nas zoas de influencia forestal co gallo da celebración de festas locais ou de arraigada tradición popular, como é o caso da Festividade de San Xoán (noite e madrugada dos día 23 e 24 de xuño, respectivamente), NON PODENDO REALIZARSE TAMPOUCO NINGUNHA OUTRA QUEIMA DISTINTA DAS ANTERIORES DENTRO DA ZONA URBANA DO TERMO MUNICIPAL DE VIGO.

2.-Todas as solicitudes que se interesen deberán presentarse cunha antelación mínima de doce días á celebración do evento, co obxecto de poder analizar o seu contido e poder remitir a autorización, en caso de ser concedida, ao distrito forestal correspondente da administración autonómica, cunha antelación mínima de corenta e oito horas á celebración do evento.

3.- As solicitudes que eventualmente resultasen concedidas quedarán supeditadas na súa validez e eficacia a que o índice de risco diario de incendio forestal non sexa extremo, debendo entenderse automaticamente revogadas as autorizacións emitidas con anterioridade.

4.- As autorizacións outorgadas non eximirán, en ningún caso, das responsabilidades por danos e prexuízos a que houber lugar no caso de que concorrese neglixencia ou imprudencia

5.- A celebración de Cacharelas/Sardiñada de San Xoán nas vías ou espazos públicos de titularidade municipal só serán concedidas ao colectivos ou asociacións veciñais e culturais debidamente constituídos.

6.- As persoas, organizacións e comunidades que desexen realizar unha cacharela de San Xoán deberán presentar a solicitude correspondente no Rexistro Xeral do Concello, como data límite, o 11 de xuño, sinalando o nome, enderezo, teléfono e fotocopia do D.N.I. dos responsables da organización ou comunidade. A solicitude debe ir acompañada dun plano de situación (solicitado na oficina de Información urbanística) do espazo onde se vai a situar a cacharela e os seus elementos accesorios.

7.- No caso de realizarse en terreos públicos de titularidade municipal terá de presentarse unha POLIZA DE SEGURO DE RESPONSABILIDADE CIVIL cunha cobertura conforme ao disposto no Decreto 226/22 (DOG num. 13 de data 19/01/23) , achegando conxuntamente o comprobante de estar ó corrente de pago.

8.- Os elementos da fogueira deberán estar colocados con dous días naturais de antelación a súa queima, para que o Servizo municipal de Extinción de Incendios e Salvamento poida levar a cabo a revisión e control desta coa antelación suficiente.

9.- En Zonas urbanas, o volume do combustible da cacharela non excederá os catro (4) metros de diámetro, nin dous (2) metros de altura, mentres que nas zonas rurais, o volume do combustible da cacharela non excederá os seis (6) metros de diámetro nin os tres (3) metros de altura.

10.- A separación entre as cacharelas, edificios, árbores, vehículos e mobiliario urbano será como mínimo de 12 metros, excepto no casco urbano.

11.- Prohíbese a queima de neumáticos, plásticos, espumas de poliuretano, aceites, derivados de hidrocarburos, fedorentos tóxicos, así como de calquera outro material ou produto contaminante ou substancias susceptibles de desprender fumes tóxicos. Asemade, coidarase de non botar ao lume recipientes que conteñan líquidos inflamables ou gases a presión (sprays), aínda que estean baleiros.

12.- As fogueiras non se poderán facer en lugares próximos á liña eléctrica, inmobles, zonas verdes ou de xardíns, e naqueles ámbitos ou emprazamentos nos que poidan crearse situacións de perigo.

13.- No suposto de que a cacharela se faga sobre terreos de uso público lousados, asfaltados ou pintados, os organizadores encargaranse, pola súa conta, de protexer o pavimento cunha capa de area de 10 cm. en toda a superficie da fogueira.

14.- Prohíbese a colocación e exhibición de pancartas sobre terreos de uso público que non estean expresamente autorizadas.

15.- A hora límite para rematar a celebración é as 04:00 horas da madrugada, de acordo co horario establecido no art. 5.II.5 da Orde de 23/10/20 da Vicepresidencia Primeira e Consellería de Presidencia da Xunta de Galicia (DOG 30/10/20), para a celebración de festas e romarías populares.

16.- Ao finalizar a cacharela e antes de abandonar o lugar da mesma, os responsables da organización coidarán de que as cinzas queden totalmente apagadas, debendo retirar todos os restos que queden unha vez rematado evento.

17.- Os organizadores deberán cumprir co establecido na Lei 11/2010 de 17 de decembro, de prevención do consumo de bebidas alcohólicas en menores de idade.

18.- Prohíbese, con carácter xeral e agás as autorizacións que con carácter excepcional puideran ser outorgadas, a celebración de Cacharelas de San Xoán nas praias, parques e xardíns de titularidade municipal, no ámbito do Casco histórico, así como preto de calquera elemento que constitúa o patrimonio histórico ou cultural.

19.- O desenvolvemento de celebración das cacharelas e sardiñadas deberá axustarse ao permiso concedido e as ordenanzas municipais que eventualmente puidesen resultar de aplicación.

20.- A competencia para resolver as solicitudes correspóndelle á Concelleira Delegada de Seguridade, Contratación e Xestión Municipal conforme ao réxime de delegación de competencias efectuada pola Xunta de Goberno Local en acordo de data 08/09/2022, en relación coa resolución de delegación de competencias do Alcalde de 06 de setembro de 2022