Escudo Concello de Vigo

Deportes

Noticias Concellería de Deportes

14/11/2017: Novos horarios de apertura das pistas municipais de atletismo de Balaídos

O Concello de Vigo anunciou o novo horario de apertura do estadio municipal de atletismo de Balaídos, que entrará en vigor este mércores día 15.

Dende que a Concellería de Deportes asumiu no verán a xestión directa das pistas, o concelleiro Manel Fernández mantivo diversas reunións cos clubs usuarios habituais (Celta de Atletismo e Atletismo Feminino Celta, Agrupación Viguesa de Atletismo, Comesaña Sporting Club e Atletismo Beade) para adecuar os horarios e o persoal municipal ás necesidades e intereses comúns. Nestas semanas o edil tamén se entrevistou con atletas para coñecer a súa opinión, inquedanzas e necesidades.

Trala última reunión mantida este venres coas entidades deportivas, das que escoitou diversas suxestións, e reunirse cos técnicos municipais para pechar o horario de funcionamento da instalación, Manel Fernández anunciou que as pistas abrirán un total de 49 horas e media de luns a domingo, con dous días de apertura matinal e vespertina (mércores e venres, de 10:00 a 13:00 horas e de 16:00 a 22:30 horas), dúas datas de mañá (sábado e domingo, de 9:00 a 14:30) e tres xornadas de tarde (luns, martes e xoves, de 16:00 a 22:30).

"Estes horarios non son pechados para toda a tempada; os clubs saben que se poderán modificar dependendo das necesidades e demanda deportiva", manifestou o concelleiro de Deportes, como xa trasladou ás entidades deportivas presentes na reunión do venres.

Cando no verán o Concello incorporou ao parque de instalacións deportivas municipais o funcionamento das pistas, nos dous últimos anos con xestión externa, xa anunciou aos clubs que os horarios serían revisables a demanda.

Onte mesmo o concelleiro dirixiuse ás entidades por carta para informarlles oficialmente destes horarios "que estimamos van atender a maioría das vosas propostas", indícalles no texto. Para a Concellería as propostas dos clubs eran "lóxicas" e o edil traballou cos técnicos de Deportes para axustar as rotacións e distribución do seu persoal a fin de ampliar horarios en Balaídos e "optimizar os recursos humanos e materiais destinados ao desenvolvemento da modalidade", explicou na misiva.

Os horarios estarán suxeitos, como é habitual, a posibles modificacións por competicións, axustes de programación ou mantemento.

(Ver información)


Banner Vigo Terreo de Xogo