TRANSPORTE PÚBLICO: OS VIGUESES PODERÁN SUBIR DE BALDE NO BUS HISTÓRICO PARA CONMEMORAR O DÍA EUROPEO SEN COCHES

O vindeiro día 22 de setembro, coincidindo co Día Europeo sen coches, Vitrasa sacará á rúa o seu Bus Histórico “O Cometa”, símbolo da compañía pertencente á primeira frota que se presentou en Vigo no ano 1968. O obxectivo é que as viguesas e vigueses poidan coñecer un pouco máis da historia da compañía, conmemorando deste xeito o 50 aniversario da empresa.

O Bus Histórico arrancará do Paseo de Alfonso ás 10.00 horas con saídas cada 30 minutos ata as 14.00 horas e dende as 16.30 ás 20.00 horas (derradeira saída). Os usuarios poderán acceder ao Bus en todas as paradas do seguinte percorrido: Porta do Sol, Policarpo Sanz, García Barbón, Isaac Peral e volta por G. Barbón, Porta do Sol e Paseo de Alfonso. A capacidade máxima durante o percorrido será de 20 persoas.

En palabras de Juan Carlos Villarino, Director Xeral de Vitrasa “durante meses realizamos un proceso de restauración do ´Cometa´ tratando de conservar o modelo orixinario de 1968 co obxectivo de achegar aos cidadáns parte da nosa historia. Levamos 50 anos evolucionando coa cidade, prestando un servizo de calidade e que responde ás necesidades do usuario. Por iso, seguiremos traballando nesta liña e incorporando as últimas innovacións en materia de sustentabilidade e accesibilidade”.

Bus Turístico e liña C1

Ao igual que o ano pasado, o Bus Turístico de Vitrasa será tamén gratuíto o 22 de setembro para que os vigueses poidan coñecer, de primeira man, a ruta que realiza habitualmente este autobús. Trátase dun servizo dirixido principalmente aos turistas e que é empregado anualmente por preto de 8.000 persoas.

A través desta iniciativa, os veciños de Vigo terán a oportunidade de coñecer os principais puntos de interese turístico da cidade dunha forma diferente. Durante o percorrido, que dura aproximadamente unha hora e media, os viaxeiros poderán apreciar as fermosas vistas da ría desde o monte do Castro, o miradoiro de Alfonso XII ou as praias de Samil, entre outros lugares.

As rutas partirán da parada de bus do C.C. A Laxe ás 10:00, ás 12:00, ás 16:30 e ás 18:30 horas. Para poder acceder a este servizo, os usuarios interesados terán que facer a súa reserva no teléfono 986207474, de 9:00 a 14:00 horas dende o 17 ao 20 de setembro cun máximo de 8 persoas por chamada, achegando número de DNI e de telefono de contacto.

Tamén será gratuíta a liña C1 cos seus horarios habituais. Esta é unha das liñas con máis usuarios -unha media de 3.000 persoas empregan esta liña en sábado-, xa que realiza o seu percorrido por numerosas paradas do centro da cidade.

Máis dunha década participando na Semana Europea da Mobilidade

Desde hai doce anos, Vitrasa vénse sumando a esta iniciativa europea que ten por obxectivo fomentar o emprego do transporte público na cidade e concienciar da necesidade de reducir os índices de contaminación nas grandes urbes e contribuír a unha mobilidade urbana sostible.